مدخل (1)
(إهداء لكل عامل محارة)
حلمى ابراهيم
ولا أجدع لاعب سيرك
معلَّق نفسه على العمدان
والخلْق الماشية فى الشارع بتشاور ع الجُدران
والمتر بكام
مع إنه بيفرد عُمره على الحيطه راقات
والمونه المعجونه ف هَمُّه بتلحس إيده مع الأسعار
يا زبون يا قاعد ع القهوه
الشيشه بكام ؟!
مدخل (3)
على آخر درجه ف سلم ابويا
شوية بوص
ومباريم خشب
ومشروع للخير
في دولاب الحيط
كمبيالات
ورهنيات
وكلمة شرف
ع الرُف التانى
شال
وسبحه يُسر
ومتر عضم
ما كانش يقيس لحم الناس
من وقت لوقت
بالمح ضي عينيه وهيَّ بترصد
ميل المادنه بتاعة الكفر 2 مللي
وقعت بعد ما مات.
مدخل (2)
لو انت على سور الجمعيه
داير الناحيه ع اليمين
داير الناحيه ع الشمال
جماهير بطول الترعه بتقول :
" سِن يا رجب
سِن يا عرفه
بالطول بالعرض ح نجيب الأهلي الأرض"
الفرقه ردِّت م الغيطان
اتجاه الملعب عكس اتجاه الريح
ريحة الكيماوي زاعقه والنقطه نازله الفجر
عُرض الحاج نبوي طايره والشَّبكه آخر حائط صد
الأرض نِشفِت مِ الهتاف
مخلص / أنور / يوسف / عبده / هاشم
خيري / عزت / عاطف / سامح / صلاح
حسام / أشرف / عمده / نبوي / زاهر / جوده
حبشي / منجي / عفيفي / البنا / العليل / طلعت
سعد / حسين / أمين / سمير/ قاسم/ شيوي / سيد احمد
شيحه / راضي/ عمر / الضبيع/ مصباح
الكل ح يغيَّر
الصاوي صفر والغزالى روَّحوا
عتبه
الزمن ما بيمُرش
إحنا اللي بنمُر عليه
والمكان ثابت مهما اتبدلت شواهده
كفر الروك
شبه جزيرة أسفلت بلدنا
وخشب العرش انشال
وانشال كوبري الباشا
بس جسور الترعه زيّْ ما هيَّ
رغم ان ترابها هالوه
يوووووووه
كنا لابسين الدنيا مايوه
الوقتي
أرض الواطيه صحت ع اللّعلاو
والرمله طالعه ديون
وجنينة البيه معادتش متحاطه بسور
لكن لسه فيها أوضة التليفون
اسكت
(بيقولوا بتِعلا حرارته بعد النوم)
لساك فايت قدمك
على أرض الشون
الغزاليهْ
الغزاليهْ لَمّْ الدور
اللّعدادي ..
لبتدائي
جُرن العوضيّه
فاكر جُرن العوضيّه
يا اولاد
من بكره الغياب في جُرن العوضيّه
بس الحضور ع الخط
مفيش ملاّيه أو دفتر
مفيش سِن سبعه
ع الفدان نفر
واليوميه غازيّهْ
أعمال الشَغب الأولى ف حارة الحبايسه
وهتافك ضد الـ الـ ....
يسقط المطر
صوت الحاج محمد
كُتّاب الشيخ عبود
كلية أحمد ابو حامد
الفتوه
خيمة الشيخ علوان
الشبنيه .. ضريح المشايشه
كنس الأمير أحمد يوم الجمعه
سينما ربيع
زير الصوالحه
قيراط ام عُمر
أرض البِركه
نخلة الشيخ .. مارد الجبانه
ساقية الشيخ حسن
ماسورةْ عبد الكريم
ترعة الشعالَّه
وِش أرض الركن اللّي ابوك قطَّعه
ونحل السيد افندي اللّي قرّص نفسه ومات
بعدين
صوت ماكينة الطحين اللّي انخرس
ورهن أرض البلد للبنك وجري ابوك
والحاج احمد الصاوى وموتهم
واحد ورا التاني فيها
وما تنساش
بلع أبوك للراديو قبل النشره
وبلعه حبوب بعد النشره
ذكرى الثوره وسته وخمسين وثوَّار عمي جاهين
أيام سبعه وستين
ووجوه ع الشط ولبنودي وناس بتقول
البترول العربي ملكك ملكك يا جمال
وح نحارب ما حناش خايفين
موت عبد الناصر
وقطعِةْ نَفَسك لجل تلِمُّه ع الجرانين
نصر اكتوبر والفرحه بسينا
وطلعِة بلدك ع السَّقاله
وطلعِة روحَك
حاسب
الخلق وراك طالعين
الإثنين يناير 14, 2019 9:51 am من طرف 
موضوع: قصيدة كفر الروك للشاعر حلمى ابرهيم